Pablo Picasso fæddist í Malaga á Spáni árið 1881. Faðir hans var teiknikennari og kenndi syni sínum undirstöðuatriði í málaralistinni. Picasso hafði ekki áhuga á neinu öðru námi.Þegar hann var 14 ára fluttist fjölskyldan til Barcelona og þar fékk Picasso fyrstu vinnustofuna sína.

Erfitt er að staðsetja Picasso í einhverjum stíleinkennum eða tækni því hans vinna spannar vítt og breitt um sviðið. Hann gat unnið með hvaða miðli og tækni sem hentaði til listsköpunar.

Listsköpun Picasso er gjarnan skipt í tímabil og má þar nefna bláa tímabilið, bleika tímabilið, tímabil formmótunar og áhrifatímabil frá afrískri list. Árið 1907 gerir hann svo tímamótaverkið "Stúlkurnar frá Avignon", sem verður upphafið að Cúbismanum sem átti eftir að gjörbylta öllum viðhorfum í samtímalistum. Að mótun þess stíls vann Georges Braque með Picasso.

En list hans þróaðist áfram og gekk hann í gegn um hvert breytingatímabilið eftir annað, ný-klassískt, súrrealískt.

Hjá myndlistamönnum gætir gjarna áhrifa frá umhverfinu og Picasso fór ekki varhluta af þeim áhrifum frá samfélaginu og má glöggt sjá það í myndinni "Guernica" sem hann málaði árið 1937, því efni myndarinnar er sótt í loftárás á bæinn Guernica um það leiti.

Picasso er einn frægasti myndlist tuttugustu aldarinnar og um leið sá allra frumlegasti, og er framlag hans til myndlistar ómetanlegt.
Picasso lést árið 1973.